САВЕТ МIНIСТРАЎ РЭСПУБЛIКI БЕЛАРУСЬ
ПАСТАНОВА
2 лiпеня 1993 г. N 431 г.Мiнск
АБ МЕРАХ ПА АДРАДЖЭННЮ ГIСТОРЫКА-КУЛЬТУРНАЙ СПАДЧЫНЫ I
РАЗВIЦЦЮ г.НЯСВIЖА
===
Улiчваючы выключную каштоўнасць, значнае месца i ролю ў
агульнанацыянальнай гiсторыка-культурнай спадчыне старажытнага
горада Нясвiжа i ў мэтах ажыццяўлення праграмы рэстаўрацыi помнiкаў,
актыўнага выкарыстання iх у культурным жыццi рэспублiкi Савет
Мiнiстраў Рэспублiкi Беларусь ПАСТАНАЎЛЯЕ:
1. Прыняць прапанову Мiнiстэрства культуры, Мiнскага
аблвыканкома, Нясвiжскага райвыканкома аб стварэннi на базе
палацава-паркавага ансамбля г.Нясвiжа i iншых помнiкаў гiсторыi i
культуры горада нацыянальнага гiсторыка-культурнага запаведнiка
"Нясвiж" з падпарадкаваннем яго Мiнiстэрству культуры.
2. Лiчыць мэтазгодным надаць палацава-паркаваму ансамблю
г.Нясвiжа статус Урадавай рэзiдэнцыi Рэспублiкi Беларусь. Размясцiць
у названым ансамблi фiлiял Дзяржаўнага мастацкага музея Рэспублiкi
Беларусь.
У гэтых мэтах:
Беларускаму рэспублiканскаму аб`яднанню мiжкалгасных здраўнiц
забяспечыць завяршэнне будаўнiцтва санаторыя "Нясвiж" у адпаведнасцi
з пастановай Савета Мiнiстраў Рэспублiкi Беларусь ад 16 лiстапада
1990 г. N 285 i перадаць ва ўстаноўленым парадку выслабаняемы
палацава-паркавы ансамбль г.Нясвiжа Мiнiстэрству культуры;
Мiнiстэрству культуры, Кiраўнiцтву Справамi Савета Мiнiстраў
Рэспублiкi Беларусь сумесна з Мiнiстэрствам замежных спраў i Мiнскiм
аблвыканкомам да 1 студзеня 1994 г. распрацаваць палажэнне аб
Урадавай рэзiдэнцыi Рэспублiкi Беларусь у г.Нясвiжы, а таксама
мерапрыемствы па яе стварэнню i ўнесцi iх на разгляд у Савет
Мiнiстраў Рэспублiкi Беларусь.
3. Мiнiстэрству культуры ў 3-месячны тэрмiн стварыць дырэкцыю
нацыянальнага гiсторыка-культурнага запаведнiка "Нясвiж", усклаўшы
на яе функцыi адзiнага заказчыка па рэстаўрацыi гiсторыка-культурных
каштоўнасцей г.Нясвiжа, а таксама па комплекснай рэканструкцыi яго
гiстарычнай забудовы i палацава-паркавага ансамбля.
Мiнiстэрству культуры сумесна з Мiнiстэрствам юстыцыi,
Дзяржбудам, Дзяржаўным камiтэтам па экалогii, Мiнскiм аблвыканкомам,
Нясвiжскiм райвыканкомам i iншымi зацiкаўленымi распрацаваць i да 1
лiстапада 1993 г. унесцi на зацвярджэнне ў Савет Мiнiстраў
Рэспублiкi Беларусь палажэнне аб нацыянальным гiсторыка-культурным
запаведнiку "Нясвiж".
4. Даручыць Мiнiстэрству культуры, Мiнскаму аблвыканкому з
удзелам Нясвiжскага райвыканкома распрацаваць i зацвердзiць да 1
студзеня 1994 г. праграму работ па рэстаўрацыi помнiкаў гiсторыi i
культуры г.Нясвiжа, комплекснай рэканструкцыi яго гiстарычнай
забудовы i палацава-паркавага ансамбля, адраджэнню вытворчасцi
габеленаў i iншых народных промыслаў у г.Нясвiжы на 1994-2000 гады.
5. У мэтах прыцягнення дадатковых сродкаў на рэстаўрацыю
гiсторыка-культурных каштоўнасцей г.Нясвiжа i стварэння ў горадзе
цэнтра айчыннага i мiжнароднага турызму з адпаведнай iнфраструктурай
дазволiць Мiнiстэрству культуры, Мiнскаму аблвыканкому i Нясвiжскаму
райвыканкому выступаць у якасцi заснавальнiкаў (удзельнiкаў)
суб`ектаў гаспадарання недзяржаўнай формы ўласнасцi.
6. Дзяржэканомплану, Мiнiстэрству фiнансаў пры фармiраваннi
рэспублiканскага бюджэту штогод прадугледжваць выдзяленне
Мiнiстэрству культуры неабходных асiгнаванняў на ўтрыманне дырэкцыi
нацыянальнага гiсторыка-культурнага запаведнiка "Нясвiж",
фiнансаванне адпаведных навуковых, праектных, рэстаўрацыйных i
будаўнiчых работ.
7. Мiнiстэрству рэсурсаў забяспечыць выдзяленне ва ўстаноўленым
парадку Мiнiстэрству культуры матэрыяльна-тэхнiчных рэсурсаў для
выканання работ па рэстаўрацыi i рамонту аб`ектаў нацыянальнага
гiсторыка-культурнага запаведнiка "Нясвiж" i асобных будынкаў у
гiстарычнай частцы горада.
8. Мiнiстэрству абароны, Камiтэту па кiраванню дзяржаўнай
маёмасцю пры Савеце Мiнiстраў Рэспублiкi Беларусь сумесна з Мiнскiм
аблвыканкомам вырашыць пытанне аб выслабаненнi ў 1993-1995 гадах
тэрыторый i будынкаў помнiкаў архiтэктуры XVI стагоддзя -
Бернардзiнскага кляштара i езуiцкага калегiума i перадаць iх на
баланс нацыянальнага гiсторыка-культурнага запаведнiка "Нясвiж" у
адпаведнасцi з дзеючым заканадаўствам.
9. Даручыць Мiнiстэрству культуры, Мiнiстэрству замежных спраў
i Дзяржаўнай iнспекцыi Рэспублiкi Беларусь па ахове
гiсторыка-культурнай спадчыны арганiзаваць пошукi
гiсторыка-культурных каштоўнасцей, вывезеных у розныя гады з
г.Нясвiжа, i зрабiць усё магчымае для iх вяртання на радзiму. Унесцi
прапановы ў адпаведныя мiжнародныя арганiзацыi аб уключэннi
палацава-паркавага ансамбля г.Нясвiжа i Нясвiжскага касцёла езуiтаў
з крыптам i фамiльнай пахавальняй князёў Радзiвiлаў у спiс помнiкаў
сусветнага значэння.
10. Мiнiстэрству адукацыi i Мiнiстэрству культуры ва
ўстаноўленым парадку вырашыць пытанне аб падрыхтоўцы спецыялiстаў
для гiсторыка-культурных запаведнiкаў, у тым лiку з адпаведнай
стажыроўкай за межамi рэспублiкi.
11. Мiнiстэрству культуры, Мiнскаму аблвыканкому, Нясвiжскаму
райвыканкому прыняць неабходныя меры па стварэнню
вытворча-рэстаўрацыйнай базы для выканання работ па рэстаўрацыi i
захаванню помнiкаў гiсторыi i культуры г.Нясвiжа.
12. Дзяржэканомплану выдзелiць Нясвiжскаму райвыканкому ў
1994-1995 гадах капiтальныя ўкладаннi на будаўнiцтва 5 тыс.кв.метраў
агульнай жылой плошчы, неабходнай для адсялення жыхароў, якiя
пражываюць у дамах гiстарычнай часткi г.Нясвiжа i памяшканнях, што
маюць гiстарычную каштоўнасць.
13. Даручыць Мiнскаму аблвыканкому i Нясвiжскаму райвыканкому
да канца 1993 года распрацаваць i ўзгаднiць з зацiкаўленымi
мiнiстэрствамi i ведамствамi спiс будуемых i рэканструюемых аб`ектаў
сацыяльна-культурнага i iншага прызначэння ў г.Нясвiжы i ўнесцi яго
на разгляд у Савет Мiнiстраў Рэспублiкi Беларусь.
Старшыня Савета Мiнiстраў
Рэспублiкi Беларусь В.Кебiч
Кiраўнiк Спраў Савета
Мiнiстраў Рэспублiкi Беларусь М.Каўко
<<< Главная
страница | < Назад
|
